!上週主日禮拜信息分享

◎上主所講的話(賽五十五10-13)              賴信頌牧師

    今仔日這段經文是先知以賽亞對受掠佇巴比倫的猶太同胞所講的話，他講上帝的話「親像雨及雪對天降落，無閣倒轉，欲潤澤大地，互五穀茁芛大欉，互撒種的有種籽，互人有米糧

。」(10)以賽亞閣強調上帝的嘴所講出的話，絕對𣍐落空，必定欲完成上帝的計劃及成就上帝愛做的代誌。這款的確信，互那時的百姓得著堅持的氣力，也互人心存敬畏。今仔日咱兼猶原相信，上帝所講的話有絕對的氣力，欲帶互咱生命的氣力。

    人佇苦難中的等候是真無容易的事，有時咱越盼望結果卻互咱越失望，這時咱閣卡要掠條上帝的話，相信上帝有祂的計畫。親像猶太人受掠後五十年，上帝才興起古列王互猶太人轉去自己的祖家，見證了先知所講的，因為上帝的時若到，祂的話絕對會實現，𣍐落空。

    上帝的應許若用人的理性來看，有時互人無法度接受，但是上帝要咱全然信靠祂的話，祂對人的要求就是要咱有單純相信的心，咱若願意順趁來領受，就欲有蒙福及滿足。咱從來呣曾看過雨及雪對天降落閣倒轉的，同款的，上帝的話代表祂的旨意，上帝既然應允就未收回，這是上帝互咱的保證。

    聖經中常常提醒咱，呣通只欲上帝的恩典，卻無盡咱的責任，所以當咱欲承受雨及雪對天降落之前，咱需要先做好準備，就是咱的心田要先除草、鬆土、撒種，當上帝供應恩典的雨及雪的時，就會潤澤咱的心田，互咱因為上帝的恩典來結出米糧，成就上帝的歡喜。咱對上帝所講的話若無信心，道理講尬賴深入，也無路用，咱的心要互上帝的話來釘根、茁芛，按呢咱的生命才有可能互上帝的話來填滿，當咱準備好勢，就會看見處處攏有恩典。

    當咱接受上帝恩典的雨及雪了後，結果是歡喜的，上帝欲互祂的百姓「歡歡喜喜離開，受引導平平安安轉去。大山小山會佇恁面前出聲唱歌；田野的樹木會拍噗仔歡喜。」(12)這個結果親像以色列人第二次出埃及，上帝互他們對巴比倫罪惡之地出來，這攏互咱看見上帝的話是確實的應允，祂的話欲帶來改變的氣力，互人對憂傷艱苦中行向歡喜及平安，上帝旨意若成就，連大自然也欲同歡喜，天地萬物攏欲謳咾這位上帝。

    13講：「以前有莿phè的所在會發松柏；有草刺的所在會發長青樹。這欲做永久不滅的記號，互恁會記得上帝的作為。」莿phè及草刺可以講是無路用的作物，也是阻擋稻穗生長的阻礙，所以一般欲種作之前會先將它們除掉。會記得當摩西受召的時，上帝互他看見莿phè互火燒卻無燒盡的情景，上帝是烈火，莿phè應該會互火燒了了，親像以色列百姓應該受滅亡，若是上帝所講的話欲遮掩他們，互他們對黑暗中行出來。今仔日上帝也藉著十字架的疼向咱顯明，咱雖莽是無路用，是應該除掉的，若是祂欲用恩典來代替咱的軟芷，應該燒盡的攏互松柏及長青樹代替了，這是上帝拯救咱的記號。

    上帝的話互咱看見祂欲將白白的恩典賞賜互咱，祂邀請咱來參加這個天國的宴席，這個宴席是無分貧賤富貴、猶太人或是外邦人，攏可以得著這個恩典，這款的觀點也就是整本聖經的中心。亞伯拉罕被上帝呼召，就是欲互萬民得到福氣；耶穌講上帝互日頭及雨水互所有的人；保羅講無論是猶太人或外邦人，大家攏同享上帝佇耶穌基督裡面的救恩，聽趁上帝的話是咱生命真要緊福分。

    當咱的生命回轉歸向上帝的時，必定得著祂的恩典。先知宣告雨及雪怎樣潤澤大地，上帝的話也欲按呢潤澤咱的生命。上帝的話也欲取代人的軟芷，咱若願意接受祂的意念並且行佇祂為咱備辦的道路，咱就欲歡歡喜喜離開困境，受引導平平安安轉去祂所應允的地。