◎蒙福的教示(箴言一8-9)                    賴信頌牧師

    上帝藉著摩西頒布十條誡互以色列百姓，來成作𪜶生活及信仰的準則，前四誡是提到人及上帝的關係，後六誡是提到人及人的關係。有關人及人的部分，一開始是講：「當孝敬你的老父，你的老母，互你的日子佇耶和華你的上帝所賞賜你的地得著久長。」(第五誡)對這個順序來看，上帝對佇子兒怎樣孝敬父母是非常注重的，這呣若是上帝的誡命，也是咱蒙福真重要的教示。今仔日咱所讀的經文講：「我的子啊，著聽老父的教督；毋通棄拺老母的教示。因為諸個話會做你頭殼頂的花冠，做你頷頸的金鍊。」(8-9)這段話是上帝要求作子兒的責任，也是子兒蒙福的教示。欲建立美滿的家庭，父母有責任教示子兒，子兒也要願意接受管教。

●我的子啊，著聽老父的教督；毋通棄拺老母的教示。

    生命的成長是對家庭開始，生活的智慧亦對家庭學起，所以父母的教導直接影響一個人基本的人格。上帝將管教子兒的基本責任囥佇父母的身上，這是父母對上帝領受的本分，所以咱呣通將管教的責任推互學校及教會，父母佇日常生活中的教導才是最重要的。

    時代不斷佇改變，約差不多十五年就有一個新的世代，照按呢來看，現在約有五個世代的人同齊生活，佇逐方面的思想或價值觀是差真多，所以咱常常無法度理解現代少年人佇想甚麼？為怎樣𪜶會按呢做？常常會因為及囝仔溝通不良來冤家，其實咱不能將問題攏推互囝仔，畢竟囝仔成長的時代及咱的時代不同款，他所面對的生活環境及咱以前的生活環境麻不同，當然所帶來的想法及價值觀也不同，咱要學習站佇𪜶立場來看代誌，做囝仔也要體諒父母的心。

    聽趁父母是家庭的秩序，有秩序的家庭才會安定，欲建立這個秩序是互相之間攏有責任，子兒欲聽趁父母之前，父母要先落實上帝的教導。聽趁就是孝敬的表現，是幸福的源頭，親像弗六2所講：「著孝敬父母」，這是頭一條附帶應允的誡命，「按呢做恁就會逐項好勢，佇此個地久長徛起。」

●因為諸個話會做你頭殼頂的花冠，做你頷頸的金鍊。

    人生最重要的就是敬畏上帝來得著智慧，但是有時咱對上帝的領受有限，咱需要藉著別人的經驗來幫助咱，互咱得著生命的智慧。父母及咱的關係是最親的連結，𪜶陪伴咱經歷人生的路，𪜶也比別人更加了解咱的心思意念，𪜶是咱生命最好的老師。囝仔成長的過程逐日佇看父母的行為，佇無意的中間自然就被影響。如果父母真虔誠、真有信心、真倚靠上帝，子兒自然也掠這作模樣；同款的，父母不行正路、行為偏差，也會影響囝仔的價值觀。

    佇申六7提醒每一個父母講：「嘛著殷勤教示恁的子兒。無論佇厝內坐，佇路裡行，倒啲抑是起來，攏著唸互𪜶聽。」當咱願意用上帝的話教示子兒，互𪜶認識真理、遵行上帝的旨意，就欲互子兒得著榮耀，就親像頭殼頂的花冠、頷頸的金鍊同款。花冠及金鍊代表一種榮耀，父母教示子兒的智慧，可以互子兒活出榮耀的生命。人生對家庭開始，人格對家庭塑造，智慧也對家庭學起，父母對子兒的教導、付出及疼惜是子兒成長的禮物。聽趁父母並呣是講無有主見、欠缺獨立性，其實是智慧的表現，因為父母所經歷的就親像一面鏡，幫助咱認識行正確的路，兼採父母無完美，卻有上帝欲互咱領受的智慧。

    上帝的話充滿祂對人的應允，咱若願意照祂所講來行

，所應允的也欲踮佇咱的內面，祂應許的話必定未落空。今仔日這段蒙福的教示有祂互咱的應允，咱若願意聽老父的教督以及老母的教示，咱就欲得著榮耀的冕流，親像頭殼頂的花冠、頷頸的金鍊，互咱的生命得著上帝的賜福。