◎互自己成作神蹟(出埃及記十四19-31)        賴信頌牧師

    神蹟對佇信仰有相當的影響力，有人因神蹟而接受基督作主，親像多馬原本無相信耶穌復活，直到復活的耶穌顯現，互他摸所釘的跡，他才相信，而且告白耶穌就是主。但是也有人因為神蹟而拒絕信主，因為神蹟及人的理性相衝突，所以就拒絕耶穌作救主，無法度接受神蹟。

    佇聖經中記載，以色列人佇埃及受到埃及人的苦毒、做苦工，他們就吐氣哀求，他們哀求的聲透到上帝遐。當上帝決定欲帶領他們出埃及，就不斷彰顯祂的氣力佇他們的中間，藉著神蹟互他們經歷上帝的同在，將他們對埃及的手中釋放出來，今仔日的記載互咱看見上帝怎樣運用神蹟來導以色列過紅海。

    上帝吩咐摩西講：「你攑柺仔伸手指海，給海分開；以色列人會佇海中行焦地。」(16)上帝吩咐完，之前佇前面導路的雲柱跑到後面，隔開了埃及及以色列百姓，兩旁歸暝𣍐當接近。天欲光的時，摩西照上帝的話行，將手中的杖指向紅海，過去呣曾看過的情景出現佇眼前，紅海竟然分開啊！上主互真強的東風吹歸暝，互海水退去，海成做焦地，水分做兩旁。這互以色列百姓大有信心，勇敢壯膽來行這條空前絕後的路。

    紅海象徵著審判及死亡，是以色列人得救，埃及人滅亡的所在，以色列人過紅海呣若是憑著信心，也是憑著行為，藉著上帝的使者及雲柱的引導，他們願意用信心來配合，就下海走乾地，結果就得著拯救。過紅海對基督徒來講是一個得救的記號，也是受洗的象徵，就是保羅佇林前十1-2所講：「兄弟姊妹，我愛恁會記得，咱的祖先攏跟隨摩西，佇雲的保護下過紅海。𪜶佇雲內，佇海裡，受洗歸佇摩西。」這攏是佇彰顯上帝的作為，欲互咱因為上帝的作為來堅定咱的信心。

    成作一個基督徒，咱是用甚麼態度來看神蹟？「神蹟」原文的意思----「奇妙的事實」，是一種超越自然律的事實，因為神蹟是超越自然，所以有的基督徒就認為神蹟是上帝的事，人只要照耶穌的教示去行就夠額，是呣是有神蹟並未影響自己的信仰。這款的講法不能講是呣對，只是咱呣免用消極的態度來看神蹟，也呣免去否定神蹟的存在，因為佇上帝創造宇宙萬物的時，有用自然律來管理這個世界，也佇特別的情景下，照人的需要特別彰顯祂的權能，施行超自然的能力佇咱生命中，這就是神蹟。

    神蹟是上帝藉著祂的能力所行的作為，若是邪神所行超越人氣力的作為，咱稱是「邪術」或「假神蹟」，因為這呣是對上帝所行的事，也無歸榮光互上帝。神蹟就是佇證明上帝的大能，也是證實上帝的救恩，上帝有時親自來行神蹟，有時透過別人來行神蹟，當人成作上帝所使用的器具，上帝的能力也會幫助人行出神蹟。神蹟超越人的氣力，實際行神蹟的是上帝呣是人，因為神蹟是屬佇上帝的作為，欲互人看出上帝的偉大。

    耶穌曾吩咐拼歸暝掠攏無魚的西門彼得，要他將船划去深的所在，拋網落去掠魚。結果𪜶一下放落去，網著真多魚，網煞強欲破去，他們將魚貯佇兩隻船，貯到滿滿煞強欲沉落去。西門‧彼得一下看著，就跪落去耶穌的腳前，講：「主啊，請離開我！我是一個有罪的人。」(路五8）𪜶拖船倚岸了後，將一切放咧，去隨耶穌。神蹟呣只是奇事，閣卡重要的是神蹟欲改變人的生命，藉著神蹟來悔改來更新生命，當咱的生命互主改變就是活活的神蹟。

    神蹟是出佇上帝的權能，無論是上帝親自的作為或是透過人來施行，攏是佇彰顯祂的大能。聖經中的神蹟攏是佇提醒咱要閣卡謙卑來倚靠主，互咱成作上帝的神蹟。願咱的生命攏有上帝的神蹟，佇有限的生命中見證這位無限的上帝，相及來經歷生命中的紅海。