◎咱欲求甚麼(馬可十35-45)                  賴信頌牧師

    如果咱有機會及耶穌相遇，你會向耶穌求什麼？名聲地位？事業亨通？家庭美滿？身體健康？若是雅各及約翰把握機會向耶穌求講：「你得著榮光的時，請互阮一個坐你的正旁，一個坐你的倒旁。」(37) 𪜶相信耶穌就是上帝所差來的彌賽亞，耶穌呣若是救主，也是大能的君王，欲帶領𪜶進入新的世代，所以𪜶就把握機會「卡位」，盼望以後有機會坐佇耶穌的兩邊。私心及慾望可以講是人性的一部分，人人攏會顧自己的利益，為著現實來設想，凡事是攏掠自己的利益作根本，「利己主義」是真正常的代誌。

    遮的學生已經追隨耶穌有一段時間阿，卻猶原無法度放未記新國度的美夢，無法度理解耶穌怎樣會及受死的十字架連做伙，這互咱看見人的觀念欲轉變呣是一件簡單的事。𪜶思思念念地上的榮耀及權勢，所以耶穌才會對𪜶說：「恁毋知家己啲求什麼。」今仔日發生學生相爭欲作大的這件代誌，我想耶穌的心內應該真鬱卒，因為祂來到世間的目的並呣是欲作君王建立王國，所以祂再次向學生說明祂來到世間的目的呣是按呢。

    耶穌給𪜶講：「恁毋知家己啲求什麼。我飲的杯，恁會當飲𣍐？我受的洗，恁會當受𣍐？」𪜶講：「阮會！」(38-39)為什麼耶穌講𪜶毋知家己啲求什麼？因為𪜶認為耶穌所得著的榮光，就是世間人所追求的權柄及尊貴，並呣是耶穌基督所說的受難，所以𪜶馬上就回答講「阮會！」。其實耶穌佇遮所講：「飲的杯、受的洗」及𪜶兩人所了解的差真遠，𪜶講：「阮會！」大概是想到君王所享受的特別權利。這個「杯」佇聖經中是表示上帝忿怒的懲罰，耶穌所飲的杯，就是指祂欲去耶路撒冷，然後被人出賣，最後被釘死的苦難，耶穌所受的洗就是一種「苦難的洗禮」，莫怪耶穌講：「恁毋知家己啲求什麼」。

    「毋知家己啲求什麼」，這是一個真有意思的問題，因為這也是咱需要去想的問題，咱兼知自己佇求甚麼？咱需要靜落心來想，咱是呣是親像耶穌基督所講的，根本就呣知自己佇求甚麼？咱常常佇祈禱中向上帝祈求真多，甚至祈禱真久，咱所祈求的到底是甚麼？是為甚麼來祈求？這攏是咱需要學習的信仰功課。耶穌要咱求的是甚麼？就是求上帝的旨意，呣是求自己的歡喜，咱若願意掠上帝的旨意作優先，上帝的賞賜也欲踮佇咱，就是太六33所講：「獨獨代先求伊的國及伊的義，就諸個物攏欲續互恁。」

    雅各及約翰的表現及真多人所求的同款，成作基督徒的咱，咱兼真正清楚自己所求的是什麼嗎？咱兼了解自己所求的是對自己有利益？佇雅各書四2-3講：「恁得𣍐著所愛的，因為無對上帝求。恁祈求，毋拘得𣍐著，因為恁的動機毋好，所求的干焦是欲滿足家己的快樂。」咱活佇世間，往往只會記得自己的欠缺，盼望可以享受財富、地位、名聲等等，卻未記得尊榮後面要合佇上帝的心意，咱要有謙卑的心來祈求，才會更加明白上帝的旨意。

    耶穌並無指責這對兄弟，但是耶穌對他們講：「不過坐我的正旁倒旁毋是我會當互人的。上帝為著什麼人準備就互彼個人。」(40)耶穌的意思是講：互誰坐佇右邊或是左邊，攏是上帝的主權，這是屬佇上帝的權柄。佇43-44節耶穌按呢講：「不過恁中間就毋應該按呢。恁中間愛做大的著做恁的差用；愛做第一的著做眾人的僕人。」佇遮耶穌指出信仰團契及政治團體最大的分別，佇信仰團契中，欲做領袖的就要做僕人，欲帶頭的就要服事人，這種僕人的觀念才是信仰團契及政治團體最大的差異。求主幫助咱，互咱有屬天的智慧願意成作僕人，謙卑來服事人及教會。