◎咱著行此條路(賽三十19-21)             賴信頌牧師

    漁翁島燈塔踮佇澎湖縣漁翁島西南端，這個所在原本是起造西嶼塔燈，西嶼塔燈是1778年興建，是全臺灣最早的一座燈塔，塔身為圓形鐵造，最早是點二芯煤油燈，光度約500燭光，每30秒連閃白光2次，光達15海浬（27.76公里），另外配備3座鑄鐵霧炮，那時有起宿舍也派人駐守，現在只保存西嶼塔燈紀念石碑一座。漁翁島燈塔是佇1875年佇原位所起的新燈塔，來代替西嶼燈塔的任務，佇1915年將漁翁島燈塔及周圍相關建築物攏漆成白色，就更加醒目，現在漁翁島燈塔被訂作國定古蹟，週圍地區被設定作古蹟公園，1981年增設霧笛2座，佇1992年開始開放互民眾參觀。

    咱或多或少攏有迷路的經驗，每一個十字路口看起來攏同款，但是每一條路攏通往不同的所在，透過路牌的指示及咱的經驗，佇腦海中慢慢有一幅地圖，咱就可以清楚知道所欲去的所在，燈塔就是幫助船隻知道正確的方向，安全指示船隻行佇正確的路。咱生命的道路是怎樣？咱應該左轉或是右轉抑是直走呢？上帝就是咱生命的老師，祂欲指示咱甚麼是正確的路，祂欲對咱講：「這是正路；恁著行此條路。」(21)

    今仔日這段經文的背景是希西家作猶大王的時，約是主前714年。那時亞述帝國非常強大，強大的國家就有野心，想欲侵占其他的國家，這時猶大國也面對這款的威脅，面對這個強大的國家，他們應該怎樣作呢？希西家及他老父攏是向外尋求幫助，盼望聯合其他國家的能力來保護自己。希西家用自己的想法去及埃及結盟約，尋求法老的保護，因為當時的埃及也是一個強大的國家，這款的決定其實也是一個好的辦法，但是上帝並無歡喜希西家的決定，所以第三節講：「毋拘向望法老保護，變做恁的見笑；期待埃及致蔭，顛倒互恁漏氣。」

    今仔日這段聖經是上帝美好的應允，上帝藉著以賽亞按呢講：「徛起佇耶路撒冷，錫安的人民啊，恁𣍐閣再啼哭。伊聽著恁啼哭的聲，會施恩互恁；伊一下聽著就會應恁。」(19)這個應允是欲互踮佇困境中的人看見光，雖莽所行的路是艱難，上帝已經聽見咱的啼哭，所以咱並無孤單，祂欲施恩互咱。

    雖莽希西家王是選擇倚靠埃及呣是倚靠上帝，但是上帝猶原願意聽候他的回頭，並且應允欲施恩互他。人願意「聽候」，是因為咱對這件事有盼望，呣只是人對上帝要有盼望，上帝對人也是有盼望，因為祂是歡喜施恩互人、而且憐憫人軟弱的上帝，當咱願意回頭來行佇上帝的正路，必定有多多福氣踮佇咱的身上。

    欲行佇這條正路並無簡單，咱要行向正確的方向才未失迷，若是方向呣對阿，閣卡努力也無路用。上帝知道咱的需要，祂欲成作咱的老師來指導咱，祂欲顯現自己互咱看見，所以若有祂佇咱的生命中指導咱，咱就呣驚尋無方向。當咱願意互上帝作老師來指導咱，按呢無論偏正旁抑是偏倒旁，攏是正確的路，咱會聽著後面有聲對咱講：「這是正路；恁著行此條路。」(21)

    以色列百姓佇面對亞述霸權的威脅，以賽亞先知勸勉他們要專心倚靠耶和華，無論面對啥款的境遇，咱若願意回轉行佇上帝的路，耶和華上帝的保守必定及咱同在，祂也欲親自及咱同行。踮佇生命的十字路口，咱欲選擇叨一條路？當咱面對艱難憂悶衝擊的時，咱欲怎樣繼續行？這時咱需要安靜落來，排除所有的意見，安靜聽候上帝的指示，思想上帝的話語，仰望上帝的帶領，相信不久就會得到清楚的聲音。親身經驗上帝的指導，這是咱面對困境時真重要要學習的功課，願上帝賜福佇咱的中間。