◎主欲用你(馬可十一1-11)                 賴信頌牧師

    今仔日是棕樹主日，棕樹主日就是進入耶穌基督受難週的開始，就是耶穌對騎驢仔子入進耶路撒冷城、被補、受苦、受釘、到死而復活的過程，這是主耶穌佇世間的最後一個禮拜。遮的耶路撒冷城的百姓手拿著代表勝利、歡喜及征服的棕樹枝佇路邊歡迎耶穌進城，若是耶穌並無因為按呢來歡喜，因為耶穌知道現在「和撒那」的呼聲，佇幾天了後就會變作「釘祂十架」。對棕樹主日到復活節，這段時間是主耶穌最心疼的一禮拜，祂經歷了眾人的背叛，然後將祂釘死。

　  棕樹佇聖經中的象徵是喜樂，咱著互主耶穌成作咱人生中的棕樹，就欲互咱得著歡喜及興旺，所以詩人講：「義人會興旺親像棕樹。」(詩篇九二12)過去猶太人使用棕樹枝來歡迎地位崇高的人，那時群眾聚集佇城門口，手拿著棕樹樹枝來迎接耶穌入城，這是他們對耶穌的敬意。

    耶穌為怎樣欲騎著驢仔子入城？這有一個真重要的信息，就是耶穌來是欲帶來和平呣是爭戰，耶穌按呢行就是應驗先知撒迦利亞所預言的話講：「錫安的子民啊，著歡喜快樂！耶路撒冷的子民啊，著歡呼！你看，你的君王來啦！伊勝利凱旋；伊謙遜騎驢，就是騎驢仔子。」（亞九9）今耶穌故意騎著驢仔子入城，就是欲互人知道他所帶來的是和平，這才是耶穌進入咱生命的目的。

    猶太人歡迎耶穌是因為他們期待耶穌佇地上建立以色列的王國，但他們無了解耶穌來世間是欲解救咱脫魔鬼的權勢，互咱得著永活，並且建立上帝的國度。所以當遮的百姓無法度得到他們所期待的君王，過了幾日，他們就對彼拉多喊講：「釘他十字架！」，這款的景情是賴呢互主耶穌艱苦。面對這款的結果，我心裡也佇想，當咱所期待的及主互咱的無同的時，咱兼有可能再次將耶穌釘佇十架頂？答案是甚麼？只有你知道。

    佇主耶穌欲入城之前，祂要學生先去牽一隻驢仔子來，因為主欲用伊。這個代誌互咱一個真重要的功課，就是咱兼願意親像驢仔子互耶穌使用呢？耶穌怎樣是使用這隻卑微的驢仔子，呣是用戰馬呢？若是找無戰馬，至少麻牽大隻驢仔，怎樣偏偏選一隻驢仔子？用人的經驗來看，咱大概攏會認為大隻的卡理想，但是上帝卻呣是用大的來完成任務，反轉是用遐的卑微的。當咱願意互主使用，攏欲得著榮光。

    主欲用謙卑、微小的人來服事祂，因為上帝厭惡驕傲的人，欲互驕傲的人見笑。咱要常常提醒自己，著佇主面前謙卑來互主用，設始有所成就，也要迴轉親像囝仔，將榮光歸互上帝，這款的人佇天裡就是大的。

    這隻驢仔子可以被主選用，實在真有福氣，所以咱要佇少年的時就準備互主使用，呣通是等到年老鬍鬚白才願意互主使用。先知耶利米曾受聖靈的感動講：「人應該佇少年的時背伊的軛，因為這是好。」（哀三27）。一隻驢仔子並無甚麼通榮耀的，是主得榮耀這隻驢仔子才得榮耀，所以呣是驢仔子有甚麼能力，事奉上帝的人也是按呢，如果咱所作的只是求自己的榮耀，這款服事是無有榮光。

    棕樹主日是受難週的開始，是耶穌的生命最重要的轉變，有真嚴肅的意義。佇驢仔子的身上互咱看見上帝的呼召，這也是上帝對咱的呼召，咱兼願意照主的心意付出代價，互咱的信仰對相信到佇行動。咱若只是喊講：「和散那！奉主的名來彼位應該受稱讚！」卻呣願意付上代價來跟隨祂，咱就無法度經驗上帝的路。耶穌最後的入城，就是為了人類的生命，欲拯救人類「出死入活、來得自由」，就是欲實踐祂對全人類「完全的疼」，願這份疼佇咱的生命中帶互咱多多福氣，有主耶穌咱就妥當。