!上周主日禮拜信息分享 

◎將祢的路指示我(詩篇廿五4-5)             賴信頌牧師    

    詩篇廿五篇是大衛的詩，大衛一生的經歷過成功及失敗，遮的經歷互他真實去遇著上帝，互他知來到上帝的面前，祈求上帝的幫助、引導，也求主赦免他所犯的罪。大衛經過失敗了後，他就更加渴慕走佇上帝的道路，他呣願親像過去照自己的私慾來行，因為他知道只有上帝的道路才是最好的路。所疼的弟兄姊妹，咱兼願意親像大衛渴慕走佇上帝的道路？佇這段經文中咱要學習三件代誌：

●求主將祂的路指示咱

    大衛第一件代誌就是「求你將你的路指示我」(4)，這是一個真重要的祈禱，可以幫助咱有正確的選擇。一般人的生活大概攏是行自己的路，大衛會求上帝指示祂的路，大概是他發現過去照自己的路來行，表面雖莽是自由的，實質上卻帶互他無限的後悔。「指示」就是互人看見，因為有看見才會明白上帝的心意，咱的心中若有這款的渴慕，上帝必定會親像燈塔指引咱正確的方向，只要咱相信上帝的指示，這條路必定未出差錯。

    佇遮提到的「路」是複數的，表示上帝指示咱的路呣是只有一條，所以咱需要用寬闊的眼光來看上帝，呣通將上帝限制佇咱自己小小的世界，相信上帝會用不同的方式來指示咱的路。上帝的指示欲互咱的生命有豐盛的福氣，就是詩十六11所講：「你會指示我活命的道路。佇你面前，我有滿滿的歡喜；佇你正旁，我有永遠的快樂。」

●求主將祂的道教示咱

    聖經是記載上帝對咱的教示，咱通過聖經的話來尋求上帝的旨意，並且明白祂的道路，所以欲明白上帝的指示，就要回轉到上帝的教示及真理中，才能清楚知道上帝的路，明白上帝的道。上帝的指示就佇祂的教示中，咱藉著上帝的教示來看見這條路，就互咱安心行佇這條路。

    真多時候攏咱是照著自己的意思去作，佇作未落去、不能收山的時，咱才來問上帝欲按怎？咱要求上帝將祂的道教示咱，互咱無行冤妄路，因為若無行佇上帝的路，所做的就無采工。

●求主用祂的真理引導咱

   第5節講：「求你用你的真理引導我，教示我，因為你是拯救我的上帝。我歸日聽候你」。「真理」這字的有起造及扶持的意義，也有父母對子兒養育的意思，所以這句話也可以翻譯作：求主用祂的養育引導咱，親像咱會用正確的道理養育子兒，引導他們有正確的方向同款。

    咱要互上帝的真理充滿咱，互咱的生命得著上帝的養飼，佇希伯來文的「真理」猶有閣卡闊的意思，就是當咱住佇真理的內面，就會產生穩當、產生把握、也產生引導。真理是咱生命重要的引導。咱只有轉來到上帝的真理、上帝的教示，咱才能知道上帝的路，才能走佇其中無失錯。咱的心中若有這款的渴慕，公義良善的上帝必定會指示咱當走的路，佇咱得到答覆之前，咱要耐心聽候上帝，聽候也是真理的一部分。

    咱的生命需要找著一條拯救的路，互咱的生命無惦佇黑暗，來惦佇上帝的賜福中。感謝主，咱所信的上帝就是這條路，祂欲用不變的疼帶領願意跟隨祂的人，所以咱要求上帝將祂的路指示咱、教示咱、引導咱，互咱行佇祂真理的路。咱欲按怎得著這個福氣，就是12節所講：「敬畏上主的人，上主欲指示伊所著揀的路。」咱要敬畏上帝來得著上帝的指示，祂就欲向咱顯明祂的道路，咱若存著敬畏上帝的心，上帝必定會指示咱！願大衛王所經歷的上帝也攏惦佇咱每一個人的生命中。