◎賜福互恁(林後九8)                      賴信頌牧師    

    「賜福」及「祝福」兼有同款？有時好親像咱分未清楚。「祝福」的「祝」就是代求，就是咱為著對方向上帝祈求，因為人實在是有限，只有求上帝來幫助。若是咱敬拜的上帝是獨一的也是全能的，祂呣免為著人向另一位神來代求，所以上帝自己就欲「賜福」互咱。人的祝福是無定著的，若是上帝的賜福卻是掛保證的，咱的生命若有上帝的賜福，一生攏通放心向前行。

    上帝的賜福是祂疼人的表現，咱呣通看輕這個福氣，當咱越認真來看賜福就會越認識上帝。感謝上帝，祂應允欲將逐項恩典豐豐富富賜福互咱，有祂的應允，咱就呣驚生命中的風浪，有祂的賜福，新的年就充滿盼望。

◎祂的賜福互人富足無摻憂苦

    箴言十22：「上主賜的福氣互人富足，內面無摻憂苦。」富足是上帝的賜福之一，這個富足呣只是物質，更加佇心靈也富足。靠自己的努力所得來的富足是短暫又閣會失去，世間的掛慮互咱雖莽富足卻未安心。若是上帝互人的富足有一個真特別的所在，就是無摻憂苦，意思是講：當咱清楚認識上帝是怎樣賜福咱，並且知道使用祂所賜的資源來遵行祂的旨意，按呢咱就未掛慮世間的憂苦，因為咱所看見的是超越這世間的價值。當咱面對生命中的憂苦時，請咱呣通失望，要會記得上帝給咱講的話，祂的賜福若到，遮的憂苦就欲消失。

◎祂的賜福互人得著福氣

    創十二1-3記載著上帝應允欲賜福亞伯蘭的經過，上帝的賜福是對亞伯蘭一個人領受上帝的福分來開始，藉著亞伯拉罕的信心及順服，而且聽趁上帝的命令，離開偶像的世界，也用信心跑走人生的旅程，結果上帝的賜福通過亞伯拉罕一個人到佇他的家族以及後代子孫，萬族也因為他得著福氣，所以上帝的賜福是及咱的信仰真有關係。

    上帝之所以賜福亞伯拉罕，就是他的信心，什麼是信心？信心就是客觀環境完全不利，猶原全心信靠，但是人總是有軟弱的時，雖莽是信仰的老父亞伯拉罕也不例外。亞伯拉罕因為驚惶的緣故，兩擺講白賊講他的某是他的小妹，若是亞伯拉罕最後學習了全然信靠的功課，他呣若成作滿有信心之人，而且及上帝建立親密的關係，一生得著上帝的賜福。

◎祂的賜福互人永遠惦佇祂

    耶卅二40：「我欲及𪜶立永遠的約，無欲閣放拺𪜶；我欲賜𪜶福氣，互𪜶全心敬畏我，𣍐閣越走離開我。」上帝的賜福最大的福份就是咱可以永遠惦佇祂，因為上帝無閣放拺咱，是欲永遠及咱的同在。當咱的生命可以永遠惦佇祂內面，咱就未會孤單，每時刻若有上帝及咱同在，咱就呣免煩惱上帝會離開咱。咱呣是佇等候就近上帝，是上帝早就佇等候咱，欲永遠及咱同在。

    上帝佇叨位？上帝就佇咱的中間，所以上帝呣是離咱遠遠，反轉是佇咱的內面，祂應允欲進入咱的心中及咱合一。上帝欲及來到祂面前的人同在，呣是只有現在，是佇過去及將來攏及咱同在，無論佇任何時刻、任何所在，上帝攏無放拺咱，這款的賜福是永遠的，兼採所面對的親像災禍，但是請咱會記得佇災禍中，上帝也未停止賜福。

    上帝的賜福佇聖經中是真重要的觀念，上帝藉著祂的旨意來賜福咱，互咱除了得到自己認為的福氣以外，閣卡重要的是提醒咱，當咱願意互上帝使用的時，就欲佇過程中經歷上帝的同在、歡喜、供應及看顧，同時也包括上帝的教示及提醒，上帝的賜福欲互人更加知道上帝的心意及計劃，互咱佇祂的賜福中看見生命存在的價值。