◎尋光(詩一一九105-112)                    賴信頌牧師

    無有人可以永遠踮佇黑暗呣免光，因為人欲活是需要有光照他，人及光的關係是真密切的。當咱踮佇黑暗中真驚惶的時

，咱會去尋找光，因為光會除掉咱心中的不安、掛慮及無助，互咱尋著正確的方向來得著盼望及平安，同款的道理，咱也需要去尋找生命的光，互咱的生命無踮佇黑暗，是佇光明中得著盼望，所以呣管是外在的光或是內在的光對人來講攏真重要。

    高美燈塔是起佇臺中市清水區高美里這個所在，是踮佇大甲溪出海口南邊及高美濕地旁阿。高美燈塔是佇1967年所起造，塔高是34.4公尺，若是加上燈座高是38.7公尺。高美燈塔及芳苑燈塔外觀真相詳，攏是八角形的鋼筋混凝土的建築物，是臺灣唯一外觀是紅、白相接條紋的燈塔。它的主燈有150萬燭光，每30秒旋轉一圈，然後連閃白光3次，當船佇海中看見這款閃法的燈塔，就表示越來越接近高美燈塔的範圍內。

    這個月高美燈塔的經文是詩一一九105：「你的話是我腳前的燈，是我路上的光。」上帝的話就是記載佇聖經中，咱若無讀聖經就找無這個光。聖經中記載多多過去人類歷史曾發生過的代誌，也記載將來欲應驗的事，閣卡清楚交待世界的由來及結局，佇這中間有多多上帝盼望人要去明白的真理，遮的真理就親像光欲照佇咱的生命，人生的路有什麼比這個光閣卡重要呢？佇今仔日的經文中，互咱看見這個光真要緊的意義：

◎這個光有祂公正的判斷

    詩人講：「你公正的判斷，我決意欲遵行；我一定欲按呢遵守。」 (106) 人的判斷會因為種種原因而出錯，致到造成互人遺憾的後果，若是上帝的判斷是未出錯的，而且祂的判斷是公正的。上帝的話互咱看見祂是公正的主，祂所判斷的事是公正的，所以咱應該放心照上帝的話去行，這個光才會佇咱的生命中顯現。咱的生命要及上帝相配合，決意遵行上帝的話才會看見這個光。

◎這個光有祂的拯救

    詩人講：「我受著極大的苦難；上主啊，求你照你的應允保守我的性命。」(107)，「我的性命不時抵著危險，猶久我無𣍐記得你的律法。」(109)詩人對上帝的話中認識祂就是拯救人的上帝，他體驗著佇苦難中上帝會保守他的生命。今仔日咱若是踮佇苦難中，咱的反應是什麼？是埋怨？是生氣？是失志？若是詩人是求叫上帝，因為他知道上帝就是他生命的光。所以佇苦難中咱要抓條上帝的話，要持守上帝的話，要愛慕上帝的話，互上帝的光來拯救咱。詩人相信遵趁上帝的話是他最好及最正確的出路，呣知咱有這款的確信啊無？

◎這個光是咱永遠的產業

    111節講：「我將你的教示做永遠的產業，因為諸個是我心所意愛。」一般人通常是掠地上的金錢、財物、土地做他的産業，若是詩人卻是掠上帝的話做永遠的産業，因為上帝的話是過去、現在及永遠攏存在的，所以這個光也欲永遠佇的，欲引導咱直到永遠。詩人有智慧選擇永遠的事，他意愛互這個光永遠踮佇他的內面。

    人生的路有多多的黑暗，屬上帝的子兒同款會遇著試煉、引誘及驚惶，若是上帝的話欲互咱的生命有極大的盼望，因為上帝的話是咱腳前的燈，是咱路上的光。這個光呣只是佇咱平順的時，更加佇咱遇著危險試煉的時，咱要有這款的相信來領受上帝應允的話。咱著互上帝的話成做咱生活中的光，陪伴咱渡過生命中每一個黑暗的日子，祂欲親像港邊的燈塔發出光，一步一步引導咱、扶持咱，互咱無迷失方向來進入上帝恩典的港灣。