◎在永活的水泉(約四7-15)                 賴信頌牧師

    這幅畫是義大利的畫家貝內代托‧盧蒂（Benedetto Luti）（1666-1724）所畫，完成的時間約是1715-20年期間，這是盧蒂後期的作品。這是描繪約翰四7-15所記載的這段故事，那時耶穌遇到一位撒瑪利亞婦仁人來汲水，就及她講起有關水的代誌。

    這位婦仁人呣是一開始就知道耶穌的身分，甚至當耶穌向她討水飲的時，她講：「你是猶太人，哪會對我此個撒馬利亞的查某人討水飲？」(9)這表示當時猶太人及撒馬利亞人是無往來的，甚至是對立的。面對撒馬利亞婦仁人的質疑，耶穌講：「你若了解上帝互人的恩賜，閣有對你講『請一屑仔水互我飲』彼個是什麼人，你早就會給伊求，伊早就會將活水互你。」(10)耶穌的回答互她霧殺殺，明明耶穌剛剛才向自己討水喝，這時反轉講自己是活水，耶穌若是活水就呣免向她討水兼呣是？

    主耶穌及婦仁人的對話內容是有關物質的水，但主的話所指的卻是人內面的嘴乾。人的生命因為及上帝隔絕而感到嘴乾，會造成咱及上帝的隔絕就是人只看自己無看上帝，親像亞當只看自己而來墮落。當主耶穌對婦仁人講祂就是活水的時，婦仁人首先的反應就是「無汲水的器具」（11），其次就是「阮的祖先雅各留此個井互阮，伊家己、伊的子孫，及伊的牲生，攏飲此個井水，你豈會比伊較𠢕？」（12）？咱看見這個婦仁人只將注意力囥佇自己的想法，只堅持自己看法，莫怪聽無耶穌的意思。

    耶穌的話指出婦仁人的無知，婦仁人掠作自己能夠互耶穌什麼，卻呣知眼前這個人是活水的源頭。主耶穌的回答也互咱一個重要的意義，就是咱若無真實認識祂，就有可能認為自己真敖，卻呣知自己無法度佇主的身上加添甚麼？只可以對主領受多多。咱若知道上帝的恩賜，也認識主基督，咱就未閣自信滿滿誇口自己，乃是向主祈求一切所需要的，因為咱的生命、呼吸攏佇那位賜生命互咱的主相關，咱所有的一切攏是上帝互咱的恩典。

    一般人所求的攏是現實的、是看會著的、是屬世的也是物質的，但是遮的所看見的是暫時，卻無去看永遠的事。當人飲水了後暫時通止嘴乾，但是飲了猶閣要飲，永遠得未著滿足，所以物質的慾望不能互人滿足，只是引起人不斷產生新的慾望，舊的慾望猶未過去，新的慾望就已經出現了。欲永遠停止嘴乾只有一個方法，那就是接上活水的源頭，互不斷供應的水互咱無嘴乾。

    表面上好親像是耶穌因為行路厭倦，坐佇井邊等候有人互祂水飲，其實是耶穌欲憐憫這個互眾人厭棄的婦仁人，賜互她有得救的機會，耶穌欲對她講：「我才是妳生命所需要的活水！」撒瑪利亞婦仁人對耶穌得著活水，這個活水就是上帝的恩賜，欲滿足人的需要，這個活水互她的生命被改變，她無閣需要查甫人來滿足她的心，上帝已經滿足她生命所需要的。

    耶穌及撒馬利亞婦仁人的對話中提醒咱，人攏有對生命的渴望，絕對呣是滿足肉體的需要就夠額。佇遮的水有兩個層次的意義：一是肉體上的，二是心靈上的。雅各井的水只是解決生命的第一層需要，咱猶要進入第二層的需要，就是靈性及內心的需要！欲互這個需要被滿足，就要互永活的水泉進入咱的生命，互永活的水潤澤咱有限的生命。咱就親像一支有限的甘仔，當咱的甘仔裝滿垃圾，就無法度閣裝其他閣卡貴重的物件。人的心若裝滿怨恨，就沒辦法裝上帝的愛！人的心若裝滿慾望，就沒辦法裝主的救恩活水。咱的生命盼望裝什麼呢？