講未盡的恩典(詩一○三8-13)                賴信頌牧師

    每年十一月的第四個禮拜四，是美國的感恩節，這個節日因為時代的變化，漸漸成做全球的日子。詩篇一○三篇是一首感恩的詩，大衛對個人的感恩來開始，然後邀請敬畏伊的人來感恩，最後擴大到全世界，甚至包誇天頂的天使天軍攏來謳咾，最後大衛講：「我的心神啊，你著謳咾耶和華！」。佇這篇詩篇內面，就是要人紀念上帝的慈愛，也要人用敬畏及感恩來回應祂，因為佇祂有講未盡的恩典。

    佇世間咱會期待要有「善有善報、惡有惡報」按呢才有公平，如果上帝真正「公平」對待人，按呢佇祂的審判下，咱可能攏會被滅。若上帝真正照咱的罪過報應咱，咱可能攏會受到「惡報」。佇今仔日這段經文中，大衛用五個「無」互咱上帝看的怎樣包容咱，他講到：「無快快受氣」、「無長長責備」、「無永遠囥受氣」、「無照咱的罪過款待咱」、「無照咱的罪惡報應咱」等，遮的「無」是上帝無公平的恩典，也因為上帝無照咱所做的對待咱，咱才通得著恩典的救恩。

    親像舊約中的約拿，約拿本來應該順服上帝，去尼尼微傳講審判及悔改的信息，但是他卻背道而行，走去他施（西班牙）。所以當他悖逆上帝的話，被丟佇海裡，正常的結局應該被淹死，但是上帝卻為約拿備辦了救贖的恩典，安排一條大魚將他吞落，並且互他可以再次被興起、被使用。咱呣通掠做上帝只能夠使用約拿，上帝可以興起別人來做工，呣是一定要約拿不可，但是上帝將祂的救恩，臨到本來應該受審判的約拿身上，就是欲互約拿知道，既然他攏可以得著赦免，按呢原本應該遭受審判的尼尼微，若是得到上帝的憐憫及救恩，也無奇怪。對過去到現在，上帝攏無照咱的罪過款待咱，這是祂對人的恩典。

    若上帝真正是「以惡報惡」的上帝，按呢基督教就無有「奇異恩典」這首詩歌了，因為寫這首詩歌的作者是約翰紐頓(John Newton)，佇他在信耶穌之前，是一位無惡不作的大歹人。因為上帝無照他的罪惡報應他，互他無佇罪惡中滅亡，反轉互他的生命成做美好的見證。上帝的慈愛，藉著耶穌基督的寶血，來洗清咱的罪，互咱的罪無閣被計較，這就是上帝對人的用心，這也顯出祂對人的恩典。

    上帝呣是用「公平」的原則來對待咱，佇聖經中呣曾講到：「上帝是公平的」，但是聖經卻是強調「上帝是疼」。上帝的法則就是「用疼來化解歹」、「用赦免來改變歹人」、「用基督十架頂的犧牲來救贖咱脫離罪的捆綁」。上帝的疼是犧牲的疼，因為這個疼，互咱有講未盡的恩典。

　  上帝做每一件事攏有祂的作用，祂用祂的模式來對待咱，要咱佇逐樣的事來經歷祂。人犯罪祂的受氣嗲阿久，祂的責罰也是暫時的，因為責罰呣是祂的目的，慈愛才是祂的目的。所以大衛講：「天離開地許呢高，伊的慈愛對敬畏伊的人亦是許呢大！東離開西有偌遠，伊互咱的罪過離開咱亦是許遠！」(11-12)這就是上帝的心意。

    當聖殿、耶路撒冷被毁，以色列百姓被掠的時，上帝的心情是怎樣？這是上帝要的嗎？是上帝的目的嗎？呣是。上帝拍他們是為了疼他們、教他們，上帝對咱也是按呢。老父對子兒無條件的疼就親像天父，所以老父怎樣憐憫伊的子兒，耶和華憐憫敬畏伊的人亦是按呢！盼望佇這個感恩節主日，咱再次來體會自己及上帝的關係，上帝是怎樣對待咱；再次來體會自己犯了賴多罪，上帝是怎樣對待咱；再次來體會自己敬畏上帝有賴多，上帝怎樣對待咱。當咱謙卑來看自己的時，咱就欲看見祂的慈愛，佇祂有講未盡的恩典。