鹽及咱的生活有真密切的關係，除了用佇食的頂頭以外，鹽還有真多的功效。耶穌藉著鹽來做比喻，就是要咱有好的所行互人看見來見證上帝的疼。基督徒有好的所行並呣是欲誇口自己，或是受人的謳咾，最重要的是欲互上帝的名得到榮光。

    佇馬太、馬可及路加福音書中攏有記載耶穌所講這段鹽的比喻。相詳的是它們攏是強調鹽若失去味，就失去它的價值；無同的是馬太一開始是講「恁是地上的鹽」，馬可加上「恁的內面應該著有鹽，也大家著相和好。」，若是路加最後講：「有耳孔通聽的，著聽！」這三個無同的所在就是佇加強「鹽呣通失去味」的中心思想。

●鹽呣通失去味

    咱真奧底想像鹽怎樣會失去鹹味呢？這個現象佇聖經學者中有多多無同的看法。呣管甚麼款的鹽，是因為它的鹹味互咱知它是鹽，若是失去鹹味，人就無法度分別它是呣是鹽，所以失去鹹味的鹽就無閣是鹽阿，兼呣是。

    人的外表及其他動物真容易分別，但是人的內在性格卻呣是用外表就通看出來，若是做一個基督徒應該有甚麼味呢？咱若親像鹽失去味就失去它的價值，所以咱不能失去基督徒的氣味，這個氣味就是咱生命的見證及對人的影響力，基督徒失去味就親像鹽失去味，也就是失去它的價值。所以佇今仔日遮的聖經中也互咱幾點提醒：

●恁是地上的鹽

    鹽呣通失去味是耶穌比喻的中心，這個鹽及咱有甚麼關係呢？佇太五13的第一句就講：「恁是地上的鹽」。耶穌呣是講：「你是」、「他是」是講「恁是」，也就是講每一個基督徒攏是地上的鹽，這是咱對上帝所領受的使命及任務，所以耶穌講「鹽呣通失去味」是及咱每一個基督徒有密切的關係。

    鹽及人的生活是非常密切的，咱是地上的鹽，咱就不能做一個及別人攏無關係的基督徒，咱要親像鹽佇咱站起的所在發揮鹽的功效。咱是地上的鹽，是一個有滋味的鹽，呣是失去味的鹽，也就是講咱要及基督徒這個身分相符合。

●恁的內面應該著有鹽，也大家著相和好。

    咱「是」地上的鹽，呣是「親像」地上的鹽，既然是鹽就要發揮鹽的功用才有價值，所以佇馬可九50就加上：「恁的內面應該著有鹽，也大家著相和好」。真正的鹽真自然就可以發揮鹽的功能，呣是勉強、呣是表面，鹽本身的特性就是按呢。咱的生命若有上帝住佇咱的內面，自然就能發揮鹽的本能。

    鹽的功能有真多，其中最普遍的作用就是調和，調和的意思就是和睦，也就是和好，馬可要咱發揮鹽調和的本能，互大家相和好。咱若未當互人和好，就未當互人利益，咱要盡力互人和好，因為基督就是和平的使者。咱要及上帝和好，及人和好，這就是鹽的功用，也是基督徒真重要的本份。

●有耳孔通聽的，著聽！

    基督徒若失去鹽的味，就無法度為主作見證，甚至成作別人取笑的對象，耶穌這段教示雖莽真短，卻是真重要，因為咱是地上的鹽。這麼重要的教示並呣是每一個人攏聽會入去，因為他們無屬靈的耳孔通聽，若是對佇有屬靈耳孔的人來講，遮的話是相當要緊的，呣知咱是用甚麼款的耳孔來聽遮的話，路加講：「有耳孔通聽的，著聽！」

    「聽」佇希伯來原文中除了是「聽見」以外，同時也有「遵趁」的意思，聽的人呣若要聽入去，而且要有具體的行動來回應，咱若甘單有聽無去行，就親像開花無結子。基督徒要保持自己的「鹽」分，呣通互環境影響來流失，只有掠耶穌的心作心，閣跟隨耶穌的腳步，才會互咱發揮鹽的功能。