對主得著氣力的老母(撒上一9-11，19-20)     賴信頌牧師

    母親節雖莽呣是教會專屬的節日，卻是對教會來發起的，因為佇上帝十條誡中對人的第一條誡命就是：「著孝敬你的老父你的老母，互你的日子佇耶和華──你的上帝所賞賜你的地得著久長。」(出廿十12)做子兒的著愛常常感念老母的偉大及辛勞，互你的老母因為你得著安慰及榮光。

    如果欲用一個字來形容老母，我想除了「疼」這字，實在尋無閣卡好的形容詞。曾有人比喻過老母的疼，就親像路邊的花同款，無人睬，無人照顧，無人致意，但是無論大風下雨，還是寒冷夏天，只要有淡薄日頭露水，它就依然生長、開花。當咱開嘴叫老母的時，有人可以給咱應聲，這是賴呢幸福的代誌，請咱好好珍惜這世間最珍貴的疼，用你真實的疼來回報你的老母，呣通等到無有老母才來遺憾久久。

    咱可以直接對老母體會什麼是無私的疼，這互咱間接來理解上帝的疼是甚麼。當然老母也是人，有她的軟弱，也可能會犯錯，但是老母的疼卻是真真實實佇咱的中間。佇聖經中有記載真多的老母，遮的老母攏有一個真媠的所在，就是她們知道對主來得著氣力，今仔日這段聖經就記載了撒母耳的老母哈拿怎樣對上帝求子的過程。

    為怎樣無子對哈拿是一個真大的悲情，因為以利加拿另外猶有一個某叫毗尼拿，她已經有子，偏偏哈拿攏未生，毗尼拿就常常刺激哈拿，及她作對，互她真艱苦。佇苦情中哈拿知道信靠上帝，到上帝面前祈禱，並且下願欲把上帝所賜的獻互上帝。哈拿知道將冤屈帶到上帝面前，呣是用人的辦法去報復，因為她知上帝會聽她的苦情，成作她重要的氣力。

    做一個老母實在無簡單，甚麼攏要會曉，甚麼攏要做，可以講是十項全能。但是老母也有她的無奈及有限，若是可以對主來得著氣力，就通彌補人的軟弱。佇歷史上有多多智慧的老母也知道這個秘訣，她們藉著對主來的氣力，互她們的家庭得著賜福，也成就閣卡大的使命。

    亞伯拉罕林肯是美國第十六任的總統，他出身喪鄉，所受正式的教育也有限，但是他老母南茜，佇他細漢的時就常常教他聖經故事，教他背經文，並且常常吩咐他養成好的品德，好好作人，佇他只有九歲的時，老母就染病過身。但是這段短短的童年教育，卻對林肯一生有真深的影響，致到對國家、對人類也有深的影響。

    林肯雖莽冊讀無多，但是對聖經卻非常熟悉，而且時常應用。他將聖經應用佇自己的生活、事業及國家政治。佇林肯總統的演講中，常常引用聖經，用聖經的教示，也提起上帝的名。林肯講：「咱的國家唯一的安全保障，是就把根基建立佇道德及宗教上。」閣講：「佇真久以前，我就決定了，無相信聖經比相信聖經更加困難。」林肯一世人無未記老母的教示，所以他講：「有敬畏上帝的老母，絕對呣是喪鄉的人。」

    敬畏上帝的老母必定欲對主得著氣力，上帝欲賜她有智慧來管理自己的家，也互她知道怎樣教養子兒，來成做別人的福氣。親像聖經對咱講的：「智慧的婦仁人逐個建立伊的家；戇的婦仁人親手毀伊」(箴十四1)、「伊的丈夫的心倚靠伊，攏無欠缺財利，伊一世人的日互丈夫有利益無損害」(箴卅一11-12)、「伊的子兒起來稱伊有福氣；伊的丈夫也謳咾伊，講：查某子好德行者多多，獨獨你界第一的」(箴卅一28-29)

    當咱佇慶祝母親節的時，也是思念老母的時，感謝上帝賜咱攏有老母，互咱佇生命中體驗到這款無私的疼。咱要時常有感恩的心，知道孝敬父母來得著上帝的福氣，因為這是上帝的誡命。願每一位老母攏可以親像哈拿對主來得著氣力，用上帝所賜的智慧帶互恁的家充滿上帝的恩典。