呣通互好事變歹事(羅馬書七21-25)          賴信頌牧師

    俗語講：「好好鱉殺到屎流」，是指過去生活卡艱苦，可以抓到鱉加菜算是真高級的料理，但是佇殺鱉的時，若無小心把屎袋弄破，會互整個肉攏是屎味，遭踏了這個好的料理，所以這句俗語的意思就是把好好的代誌霧歹去。佇人生中，咱會期待歹事變好事，但是咱有時卻也互好事變歹事，這實在是無采工，咱欲怎樣避免好事變歹事呢？

◎要有多方面的思考

    美國有一個人名叫格林，他佇美國南北戰爭中，他看見多多人因為戰爭而受傷及死亡，他就想欲怎樣來防止戰爭的發生，他想講若是互戰爭變尬非常的可怕，以後的人就呣敢閣發起戰爭。後來格林就發明了格林機槍，這是所有機關槍的前身。對今以後，軍人就無需要一再補子彈，他們只要裝上彈匣，就可以一直射，直到子彈射完。兼采他真成功互戰爭變作可怕，但是他卻無互戰爭無閣發生。格林打算用殘忍來停止戰爭的念頭，結果是互戰爭變作更卡容易、更卡可怕。如果咱只是用單方面來想，就有可能互好事變歹事。

    當咱佇面對所遇著的代誌，千萬呣通只用單方面來思考，因為按呢咱只看到事物的某一面。若是只看一面就來認定這就是事物的全部，就真容易互好事變歹事。一個事物有千萬種不同的面，兼采美麗的風景就佇另外一面，咱若願意換一個角度就可以看見。

◎無用自己的主觀判斷一切

    保羅是一位認真打拼的有為青年，他佇大馬色路上遇到基督蒙恩之前，他攏認為自己一直佇做好事。當時他所屬的法利賽派是真受人尊敬的團體，那時的基督徒因為稱彌賽亞已經來臨，所以就被他們認為是褻瀆上帝的人。摩西的律法真清楚規定，見若褻瀆上帝的人，就要互石頭打死。保羅兼采無用石頭打死人，但是當司提反殉道的時，他是佇邊阿幫大家顧衫。保羅原本認為逼害基督徒就是替上帝做好事，最後卻變成及上帝作對的歹事，這款的結局實在值得咱來反省，如果咱真主觀來看這件代誌，攏有可能互好事變歹事。

    保羅猶未遇到世界的光之前，他猶無認識真理，無明白甚麼是對或是呣對？所以保羅講：「我所意愛的好，我無去行；我所呣愛的歹，反轉去行。」(羅七19)我相信保羅非常敬畏上帝，但是心中卻互自己的意念占滿，致到好事變歹事。

◎迴轉到主的面前

    佇信仰上咱可能會認為，如果上帝已經改變一個人，而且確實的改變，他就不可能閣回頭，若照按呢推論，如果你犯罪了，就表示你一開始就無改變嗎？如果是按呢，咱若有任何的歹就表示咱無得救嗎？保羅是一位真正互主改變的人，但是他卻講：「按呢我得知有一個法，就是當我愛行好的時，歹及我佇啲。」(21)這呣若是保羅有這款的體驗，每一個基督徒也會有這款的經驗。

    好及歹常常佇咱的內心征戰，這是一種信仰的艱難，所以保羅真無奈講：「苦啊！我的做人！是誰欲救我脫出此個致到死的體啊？感謝上帝是對咱的主耶穌基督。」(24-25)做一個基督徒對佇好及歹會特別敏感，因為咱有基督佇咱的生命中，咱無法度將歹除去，唯一解決的方法就是對咱的主耶穌基督，咱要迴轉到主的面前，求上帝互祂的好贏過咱的歹，才未互好事變歹事。

    佇人生中呣是面對逆境的時才知警醒，佇順境的時更加是要按呢，咱要求上帝幫助咱，互咱無未記得祂的教示，一世人盡力來行好事，互人因為咱得著福氣，也互上帝得著榮光。當然遮的好事也要合佇上帝的旨意，才未互好事變歹事。