你結甚麼果子？(路六43-45)                  賴信頌牧師

    果子的形成是先有樹，然後才會結出果子，果子樹的好壞會直接影響它的品質，所以樹是「因」，果子是「果」，樹及果子的關係是一種真親密的因果關係。樹就是生命，果子就是生命所顯現出來的價值，樹的好壞決定果子的好壞，生命若不好，果子也會不好，所以改變果子的方法，就是改變生命。咱欲結出甚麼款的果子，就要對改變生命開始。

    一欉果子樹的好壞對樹栽開始就要培養，若是欲等到大欉才欲改善，效果就會打折。有學者研究，一欉好的樹栽有幾個特色：

1.接枝栽

    若用接枝的觀念來看信仰，就親像耶穌所講：「我就是葡萄樹，恁就是枝。踮佇我，也我踮佇伊的，就結果子多多；因為及我相離，恁就未做甚麼。」(約十五5)咱要接枝佇基督的身上，才會有基督的體質來改變咱的生命，互咱會勘得面對生命所遇到的艱難，佇面對無水、寒冷或是病蟲害的時，攏有夠額的氣力贏過遮的困境，並且結果子多多。

2.無有病蟲害。

    咱的信仰也會有病蟲害，親像病痛、艱苦、失敗或是不如意的時，遮的攏會影響咱的信仰，互咱因為按呢而失去信心，咱若無轉去上帝的話語中重新得著氣力，就會佇失落的情緒中失去信仰。佇林後五7講：「因為阮啲行是對信呣是對所看。」欲除掉咱信仰的病蟲害，就要恢復對上帝的信心，相信祂的氣力夠額咱用。

3.根部生長穩定。

    樹的根互樹堅固，若是信仰的根互咱的生命堅固，佇林前三11講：「因為所下的地基以外無人會下別個地基，地基就是耶穌基督。」咱的信仰也要有根有基，上帝互基督成做咱信仰的根基，這個地基就是建築物最基礎的所在。主耶穌若做咱生命的地基，咱就得著主的保守，風吹雨淋也無搖動。

4.落葉果子樹的枝生滿大芽。

    對信仰來看，咱有時也要有休眠期，這個休眠期呣是甚麼攏無作，是佇等候上帝的作為，等候也就是倚靠耶和華，佇等候完互咱有氣力發出新芽。親像賽四十31所講：「獨獨倚靠耶和華者欲得著新的氣力。因欲親像鷹鳥展翅飛高；因走亦無厭，行亦無倦。」

5.常綠果子樹生滿樹葉。

    常綠果子樹生滿樹葉，可以幫助這欉樹以後結果子，因為樹葉真重要的責任就是吸收日頭及二氧化碳，互這欉樹得著需要的養分，才會結出媠的果子。詩人也看見一欉樹健康的重要性，所以講：「無行歹人的計謀，無徛罪人的路，無坐侮慢的人的位，此號人有福氣！伊所歡喜的就是耶和華的律法，暝日三思的，也是伊的律法。伊欲親像樹栽佇溪邊，照時結果子，伊的葉也未乾去。伊所做的一盡亨通。」(詩一1-3)咱若願意遵趁上帝的話來行，就欲得著福氣，這個福氣就親像樹栽佇溪邊，照時結果子，伊的葉也未乾去。

    上面所講的五個特色是好樹的特色，咱要先成做好樹，才會結出好的果子，所以咱欲結出甚麼果子，是要看咱是好樹或是壞樹。佇雅各書中教示咱，人有了信心，就必須要對行為表現出來，所表現出來的行為就是果子。

    甚麼款的生命，就結出甚麼款的果子，咱若願意照基督的生命去作，就會結出好果子；若是只照自己私慾來做，兼采自己真滿意，但是佇上帝的面前依然是壞果子。果子是內在生命的顯現，對果子就可以看出這欉樹的生命本質。一個真正的基督徒，自然就會結出好的果子，你結甚麼果子呢？