做上帝的子(約壹三1-3)                      賴信頌牧師

    咱是呣是上帝的子？怎樣確定咱就是上帝的子呢？若是對上帝的創造來講，咱攏是亞當、夏娃的後裔，藉著創造，咱攏是上帝的子是無呣對的。若照按呢來看，全世界的人攏總是上帝的子是可以接受的，但是卻有一半以上的人無認識上帝或是拒絕上帝，兼呣是真奇怪。所以閣卡重要的是做上帝歡喜的子，佇咱的所行合佇上帝的心意。

    使徒約翰所提到上帝的子的定義及咱前面所講的是完全無同，他所強調的呣是因為創造咱就成作上帝的子，乃是藉著救贖，咱成作上帝的子。約翰講：「恁想看父疼咱到怎樣，互咱稱做上帝的子。」對約翰來講，咱成作上帝的子是因為天父對咱特別的疼，呣是每一個人攏有這款的恩典，是願意承認祂的人才有。

    佇福音書中有清楚記載，這個名分是耶穌欲互所有人的，只是有人接受，有人拒絕若定。這就親像同款是子兒，有的真孝順，有的真不孝，雖莽攏是父母的子，卻呣是每一個子攏願意接納父母。

    上帝疼咱互咱成作上帝的子，因為這個身分互咱可以得到上帝國的豐盛。所以約翰講：「所疼的兄弟啊，現今咱做上帝的子，將來怎樣，猶未顯明；咱知伊若顯明，咱就親像伊，因為咱欲看見伊照伊實在的款。」(2)上帝國的豐盛呣只是今生的延續，或是無閣有今生的艱難痛苦若定，上帝國的豐盛是咱可以及基督同款，變成榮耀的形體。

　　約翰講：「將來怎樣，猶未顯明。」將來怎樣咱兼采無清楚，但是咱可以清楚知道的，就是佇基督顯現的時，咱攏會親像祂，親像基督得到榮耀，這個榮耀是咱無法度想像的。聖經曾描寫天堂是黃金街、碧玉城，但是實際的情形可能比遮的閣卡媠。咱被稱作是上帝的子，是上帝何等的慈愛，咱欲領受這款的豐盛。

　　呣過咱呣是被稱作上帝的子就夠額，咱作上帝的子也有咱要擔負的重要責任。親像約翰所講：「見若靠伊才有此號向望的，本身清氣，親像伊是清氣。」所以作上帝的子，咱有責任要過著清氣的生活，因為基督是清氣的，咱必須要及祂同款才通領受這個向望。咱要對罪惡中行出來，才勘得稱作上帝的子。約翰閣講：「見若住佇伊的，無犯罪；見若犯罪的，未曾看見伊，也呣識伊。」(6)意思是講一個人若犯罪，就無閣是上帝的子嗎？咱的上帝兼有這麼嚴格嗎？佇後面約翰有接續解釋，主要是指繼續不斷犯罪，呣願意悔改的人。

    聖經中有多多失敗的人物，其中最典型的人物就是參孫。    咱每一個人攏有弱點，咱會有意無意中來犯罪，參孫的問題就是出佇驕傲而忘記得自己的身分，他雖莽犯罪得罪了上帝，但是他馬上回轉到上帝面前祈求赦免，上帝仍然繼續重用他！只要咱時時反省，回轉到上帝的面前，祈求赦免，上帝也必用祂的恩慈及憐憫赦免咱的罪，繼續及咱同在！

    有的人認為接受救恩這件禮物，就親像已經跑到終點，若是約翰所講的，這只是跑道的起點若定。現今咱被稱做上帝的子，來學習基督的樣式，咱要常常來到天父的面前，親像基督常常親近天父一樣。做上帝的子，咱有責任日日越來越親像基督，這是上帝的子的本分。換一句話講，咱若是上帝的子，咱就著活出有上帝的子樣式的生活。

    舊約的先知佇上帝的面前是奴僕的地位，今仔日藉著基督的十字架及復活，互咱轉變做上帝的子的身分，子及奴僕之間是完全不同的，咱可以稱呼天父就是咱的阿爸。咱若常常想起自己及天父之間有這款美好的關係，咱的心就可以充滿平安及喜樂，一切的煩惱掛慮就攏欲無去。