掠耶和華作正月(出十二1-2)                  賴信頌牧師

    一月或是正月攏是一年的開始。面對一年的開始，咱應該思想怎樣去過新的年，親像詩篇九十12所講：「求你教示阮怎樣算家己的日子，互阮得著智慧的心。」願對上帝來的智慧，互咱知道甚麼是咱蒙福的路。

    過去以色列百姓佇埃及做奴隸四百年，佇艱苦又閣無奈的日子中，他們無有任何的盼望，也呣敢想欲脫離埃及法老王的手。若是信實的上帝已經聽見他們求叫的聲，就揀選摩西去拯救以色列百姓脫離法老王的手。耶和華上帝對摩西、亞倫講：「此月著做恁的正月，做年年的頭一月。」(2)上帝要摩西掠耶和華作正月，做一年的開始，就是要他們藉著上帝新的恩典，來過一個新的生活，走新的路程，向著新的目的地，成為一個新的國家。有上帝自己作他們的主，遮的出埃及的百姓欲開始他們的新生活，這真正是一個新的年。

    上帝要他們掠耶和華作正月，呣只是日子的算法改變，是要他們的生命也要改變，真可惜遮的百姓只看表面無看上帝，以色列百姓所犯的錯誤也及現今的世代真同款，呣是走投無路才願意交託，平安順利的時就靠自己。如果咱仔細看上帝的應許，就可以看見祂的應允有兩部分，就是人的本分及上帝的作為，也就是講當咱盡咱的本份，上帝就會有祂的作為，親像箴三5-6所講：「你著專心倚靠耶和華，呣通倚靠你家己的敖，佇你一切所行的事攏著認伊，伊欲指點你的路。」

●咱的本份：

    欲得到上帝的引導，咱的本分就是----佇一切所行的事攏著認伊。「認」就是知道或是認識，也就是講咱的本分就是要去知道祂、認識祂，這個「認識」呣只有承認若定，是要藉著及上帝交通來認識祂的心意。咱著怎樣做呢？就是第五節所講：「專心倚靠耶和華，呣通倚靠你家己的敖。」也就是要放棄自己的理解去看上帝的旨意。

    咱要佇一切所行的事認祂，要佇厝、佇學校、佇工作的所在認祂，相信上帝將咱囥佇遮的所在有祂的旨意；咱要佇健康或是欠安的時認祂，相信健康或是欠安攏是上帝的恩典；咱要佇平順或是試驗的時認祂，相信遮的攏是佇彰顯上帝的能力。當咱願意佇一切所行的事認祂，咱就越感受到上帝的引導。

●上帝的作為：

    「伊欲指點咱的路」，這是上帝應許欲顯現的作為。佇世間咱有真多代誌無確定，但是有一件事是確定的，就是：「如果咱若盡咱的本份，上帝就欲指點咱的路。」伊欲指點咱的路呣只是引導，猶有修平咱的路的意思。

    「伊欲指點咱的路」就是佇提醒咱，當咱行佇人生的路時，一定會面對饒疑，呣知叨一條才是正確的路。面對饒疑的時，上帝講祂欲指點咱的路，互咱無行呣對路。這就親像當時以色列百姓佇曠野的時，上帝親自引導他們頭前的路，聖經講：「耶和華行佇因的頭前，日時，佇雲柱中導因的路；暝時，佇火柱中光照因，互因日暝攏通行。日時的雲柱，暝時的火柱，攏無離開百姓的頭前。」(出十三21-22)

    上帝應許欲指點咱的路，這是及咱的生命有密切的關係，如果咱承認上帝，也願意將自己交託互祂，祂就會佇一切的路指點咱，直到生命的結局。祂欲指點咱的路，這個路是咱所有需要行的路，無論家庭的路、工作的路、感情的路、學業的路等，上帝攏願意來指點咱，祂也應許欲按呢做，所以箴言十六3就講：「你所做的，攏著交託耶和華，你所計謀的，就會穩當。」上帝要以色列百姓將出埃及的那個月改作正月，就是欲互他們重新開始有新的經歷。願咱攏掠耶和華作正月，將2021年交託互祂，相及來經歷祂引導的恩典。