猶大及馬提亞(徒一18-19，23-26)             賴信頌牧師

    猶大是巴勒斯坦最南端的加略人，主耶穌及其他的學生攏是加利利人。猶大的意思是「讚美」，聖經中常常用「加略人猶大」來稱呼他，因為當時有多多人攏叫作猶大。加略是一個盛產水果的城市，踮佇巴勒斯坦的最南邊。對猶大的名來看，相信他的父母必定期待猶大將來成作一個榮耀讚美上帝的人，但是真可惜，最後卻是行向沉淪的命運。

    佇耶穌的十二學生中，猶大是掌管金錢的司庫。司庫呣甘單要會辦代誌，也要知道管理賬目，主耶穌將這麼重要的職位交互猶大，咱通想像佇主及眾學生的眼中，他是精明閣受信賴的。若是他重視金錢，把金錢看做比其他的事攏重要，最後才會發生出賣耶穌的代誌。

    猶大互人最深的印象，就是佇「香膏事件」中的表現。當主佇伯大尼痲瘋的西門的厝坐桌的時，馬利亞打破一罐裝有一斤極貴重哪噠香膏的玉瓶，將香膏澆佇耶穌的頭頂，也用香膏抹耶穌的腳，最後用自己頭髮去擦，互厝內充滿香氣。這本是一件極媠的事，若是猶大卻出面批評講：「啥事呣將此個膏油賣銀仔三百個來互喪鄉人啊？」(約十二5)實際上猶大並呣是真正關心喪鄉人，只是想到香膏的價值，就起了貪心，這個那麼疼主的場合，猶大卻暴露出他貪財的面目。若是耶穌對猶大講：「出在伊！將此個留啲到我埋葬的日。因為常常有喪鄉人及恁佇啲，若是我無常常及恁佇啲。」（約十二7-8）

    佇猶大出賣耶穌這件事，有人認為基督降世主要的任務，就是欲為人釘死贖罪，所以猶大出賣耶穌，致到主受難來死，這是幫助耶穌完成祂的心願，怎樣定他有罪？若是耶穌佇最後晚餐中清楚的說明：「因為人子倒去，照所記載指伊的話；若是賣人子者有災禍啊！彼人無出世卡好。」(可十四21）

    猶大賣主自殺死了後，喪失了他的使徒職分，彼得就建議提出一個要求，對耶穌被約翰洗禮到主離開他們被接上升的日子為止，必須要佇常常及他們作伴的人中，立一位及他們同作耶穌復活的見證（徒一22），後來就選舉猶士都的約瑟及馬提亞兩人，這表示約瑟及馬提亞真早就跟隨耶穌，佇主揀選十二學生的時，他們並無被選到，但他們依然默默跟隨耶穌。眾使徒經過祈禱，用拈鬮，拈著馬提亞，伊就及十一個使徒同列，得著使徒的職份。

    佇希伯來語中，「馬提亞」的意思就是「上帝的恩賜」，馬提亞應該非常感謝上帝，他的使徒職分是上帝的恩賜。可能咱會感覺用拈鬮來產生真無科學，但是佇五旬節以前的那個時代，他們除了用這款的方式，並無別種的作法。眾使徒商量的結果，他們提出了兩個人選來作選擇，他們知道人的理智是有限的，所以他們轉向求叫主，只有主知人的心。今仔日咱不用拈鬮的方式，但是咱也呣通無互聖靈作咱的引導。

    馬提亞補了使徒的缺了後，不久聖靈就充滿整間教會，可見他的遞補是真重要的事，他能夠及上帝同工、及人同心。如果他的遞補是引起眾使徒的混亂，上帝的教會會互聖靈充滿嗎？當咱投入教會，教會兼會因為咱蒙福嗎？約瑟及馬提亞同齊被選，一個成做使徒，一個無，但是咱看未出他們中間有任何未好勢，呣管作使徒、無作使徒，攏有上帝的旨意佇行，。

    馬提亞成作十二使徒之一，代替加略人猶大，佇猶大身上所失落的，相信佇馬提亞身上可以找回來。他是主親自揀選的，相信他一定是一位疼主、忠心、全然奉獻的人。後來馬提亞先去猶太行省傳教，然後閣去衣索比亞，最後佇科爾基斯(喬治亞)被斧頭斬首而殉道，所以他的象徵是一本打開的聖經及一支雙面的斧頭。馬提亞的遺體傳說被埋葬在喬治亞阿扎爾自治共和國的一座羅馬堡壘的遺址內。