上帝公平嗎？(路加十五1-10)                賴信頌牧師

    上帝公平嗎？這是多多人想欲問的一個問題？欲問這個問題之前，咱要先去想這個公平的「標準」佇叨位？是用你的標準？我的標準？還是上帝的標準？兼講這世間只有一套標準嗎？人生只有一擺生及一擺死是最公平的，但是出世佇叨位？按怎樣死？這又閣無公平。

◎為怎樣咱會感到無公平

    當咱佇問「上帝公平嗎？」的時，大概心中已經認為這位上帝並無公平。人之所以認為上帝無公平，有幾個原因，第一個原因就是咱認為若有公平，就應該是善有善報、惡有惡報；第二個原因，是出佇人「愛比較」的心態，咱會想講我也無比別人卡差，為怎樣他過了比我卡好？好事若臨到我，這真公平，歹事若臨到我，這就無公平。

◎上帝有公平嗎？

    人生中總是會有真多的無奈，其中一項就是要去面對多多的不公平，因為這世間無甚麼是真正的公平。所以上帝公平嗎？我欲講：上帝真正無不公平。因為公平的原則就是人應該得到應該得著的，所做的及所收成的要成正比，佇這種公平的基礎上，上帝當然是不公平的。

    感謝上帝，就是祂的無公平，才無照咱的罪過來責罰咱，如果上帝用祂絕對的標準來判斷咱，按呢咱逐人就無一個可以存留下來，人類的歷史早就結束阿。如果上帝是公平的，咱就要自己去面對無遵照上帝命令的結果，上帝是無公平的，因為祂是充滿慈悲及憐憫的上帝。

◎耶穌對待人有公平嗎？

    呣若上帝無公平，上帝的子耶穌也無公平。佇今仔日這段經文中互咱看見，耶穌為了互多多人可以得救，也常常及抽餉的及歹人作伙，致到當時的宗教領袖法利賽人及經學士耦耦唸講：「此個人接納歹人，續及因食。」(2)遮的人心中必定按呢想，阮一心一意遵守律法，但是這個耶穌卻及遮的罪人作伙，並且也醫治遐的罪人，這種的做法實在是太無公平啊，當然對耶穌就非常無法度諒解。

    針對他們的質疑，耶穌對他們說了一個比喻：「恁中間甚麼人有一百隻羊失落一隻，豈無且放九十九隻佇山裡，去尋所失落的，到得著嗎？」(4)照一般的常理，咱若有一百隻羊，甘單失落一隻，咱會好好的看住這九十九隻，免得其他的又閣走無去。若是耶穌卻願意放落九十九隻羊，去找那隻迷失的羊，已經尋著，就歡喜背(pē)伊佇肩頭頂。同款的道理，耶穌指出，歹人中有一人反悔，就佇天裡也欲按呢為著伊歡喜，比為著九十九個義人呣免反悔的閣卡歡喜，這是耶穌的無公平。

◎著因為上帝的無公平來感謝

    咱謳咾上帝是因為祂的無公平，如果上帝是公平的話，按呢咱逐人就有災禍了。就是因為上帝的無公平，咱才通得著祂的慈愛及憐憫。上帝的無公平，才對一切相信基督的人彰顯了祂奇妙的恩典。親像詩人所講：「耶和華有憐憫，有恩典，無快快受氣，閣有豐盛的慈愛。伊無長長責備，亦無永遠囥受氣。伊無照咱的罪過款待咱，亦無照咱的罪惡報應咱。」

    其實上帝是公平的也是無公平的。上帝真公平的互咱同款的時間，無論好人或是歹人、喪鄉或是富裕、聰明或愚憨，每一個人一天攏是24小時。上帝真公平的互咱有免費的日頭、空氣及水，藉著遮的互咱生命通得成長延續。上帝真公平將祂的疼互世間每一個人，親像彼後三9所講的：「呣愛有人沈淪，是愛人攏反悔。」但是上帝卻真無公平的用憐憫對待咱；真無公平的一擺一擺赦免咱；真無公平的互咱同承受救恩。咱期待上帝用公平對待咱？也是用無公平對待咱呢？