奇妙的恩典(以賽亞書六1-7)                 賴信頌牧師

    咱若講到恩典，咱可能就馬上想到耶穌的救贖，事實上，整本聖經攏充滿上帝的恩典，所以咱也可以佇舊約聖經找到上帝的恩典。上帝有絕對的主權將恩典賞賜互世間人，這個恩典可以分兩種，就是普遍的恩典及特殊的恩典。普遍的恩典的範圍卡闊，是對所有的人來講的，親像太五45所講：「因為伊互伊的日起來照歹人及好人；亦用雨沃義及不義的人。」上帝藉著普遍的恩典向人啟示祂自己。若是特殊的恩典範圍卡窄，是互上帝特別揀選的人。這個揀選除了上帝的主權，咱也可以主動去爭取，藉著信來成作祂的子兒，因為對呣信的人來講，福音是愚憨的，若是對信的人來講，福音卻是上帝的大能。今仔日這段經文，就是充滿上帝奇妙的恩典。

    這個事件是發生佇烏西雅做王四十年的時，佇他做王的日子國家富強，因為他們的國力強盛，他們的國家就太平安樂。現在烏西雅王過身去，這個國家會變作甚麼款呢？這時的百姓是踮佇真不安情形，煩惱遮的太平安樂的日子兼會因為新的王的軟弱、無力而變作不安，兼會因為這個新的王而陷入混亂當中，這是當時百姓的煩惱。

    就佇這個時上帝互以賽亞看見異象，祂榮耀的顯現就是欲互以賽亞一個確信，雖莽世上的君王已經過身，但是天頂的君王欲永遠掌權，這位王是全能、全知的，是天使所擁護的，祂坐佇至高、榮耀、全能的寶座。這個確信就是欲給以色列百姓講，他們是得著上帝保守及看顧的。上帝向以賽亞顯現，就是欲互以賽亞得著安慰及鼓勵，祂就是施落逐樣恩典的上帝。

    上帝既然會用這種奇妙的方式來向以賽亞顯現，這是咱想像未到的。其實自古以來，上帝就不斷用奇妙的方式向人顯現祂自己，只是人硬心呣肯接受。當以賽亞看見這個榮耀的異象，這剎他體會到自己是一個甚麼款的人，他講：「我有災禍啊！我滅無啦！因為我是嘴唇無清氣的人，閣踮佇嘴唇無清氣的百姓中」(5)他未記得上帝永遠不變的疼，他未記得上帝曾應許欲保護祂的百姓，他的話充滿懷疑、失望，這攏顯出他無相信上帝過去的應許。

    上帝的恩典並無因為人的軟弱來離開，上帝知道以賽亞的內心，知道他的罪惡感及見肖的心。若是上帝體貼人的軟弱，就差遣一位充滿憐憫的天使帶來天頂的赦免來饒赦以賽亞。以賽亞的嘴唇的確是無清氣的，所以天使對天頂聖潔火焰中，夾了一塊熱熱的炭來清氣以賽亞的嘴唇。這時以賽亞對上帝恩典感到不可思議，他非常驚奇上帝對他彰顯這款的憐憫及慈愛，所以以賽亞就知道遮的百姓也欲同款得著上帝的慈愛及恩典。上帝接續講：「我通差是誰啊？是誰欲為阮去？」面對上帝這款的邀請，以賽亞攏無猶疑的回答：「我佇遮，通差我！」(8)上帝可以免差遣這個曾呣信的人去傳才呢重要的信息，祂仍然用仁慈揀選以賽亞，互他去傳揚審判及恩典的話。

    恩典是對上帝來的，這是上帝對人的憐憫及慈愛，上帝的恩典有物質的賞賜，更卡有生命的供應。佇舊約時代的人呣知怎麼生活，耶和華上帝就頒布誡命及律法，給他們講著怎樣生活、怎樣敬拜上帝，上帝欲祝福什麼人、欲咒詛什麼人，什麼是犯罪等等。到了新約時代，主耶穌道成肉體來到世間，帶來天國的福音，向人傳悔改的道，人若照主耶穌的話去行，就得赦免，而活佇上帝的恩典及賜福中。

    上帝的恩典是豐豐富富閣算未清的，上帝的作為是奇妙閣互人想未到的，如果每一個人攏知道上帝的奇妙的恩典，咱呣免閣為生活來擔憂，因為上帝就是疼。但是對咱生命最大的恩典，猶是上帝的話。上帝的話能作咱生命的氣力，指示咱頭前的路，互咱活佇上帝的庇佑中。