老父的身影(路加十五20-24) 

    過去傳統上嚴父慈母是咱對父母的印象，所以咱常常是及老母的關係卡親密，若是對佇老父真自然就會驚畏，所以對佇老父的身影常常是有距離的，甚至是霧霧無明的。每一個人對佇老父的身影感受不一定同款，但是他對佇每一個家庭來講卻是真重要的角色。老父可能嚴肅無多話，但是他卻是踮踮擔當家庭的責任；他可能憨慢表達情感，但是他用行動代替疼的語言。

    今仔日這段聖經多多人攏稱它作浪子的故事，若是我閣卡甲意稱它做「老父的身影」，為什麼呢？因為這個故事中的主角，呣只是那位浪子，閣卡重要的是那位對頭到尾攏佇等待浪子轉來的老父。這段故事的開始就提到：有一個人有兩個子；細漢的給老父講：『阿爸，我應該得的財產，請你分互我。』(11)這句話聽起來好親像只是欲要錢，但是佇當時的文化中，這句話的意思是講：「我希望你卡早死，按呢我就可以拿到我的部分。」所以這句話是互人心碎的要求，若是這位老父親無有生氣，也無有責備，他選擇了尊重，互子兒自由來決定欲行的路。咱兼曾互咱的老父因為你來艱苦，咱的老父是按怎來回應咱呢？這位老父對子兒的回應是包容、赦免及深深的疼。

    這個細漢子拿著財產了後，就出外去真遠的所在，佇遐放蕩，錢開了了，抵好彼所在發生大飢荒，他一無所有，只好去替人飼豬，甚至提豬啲食的豆莢止飢。後來他醒悟起來講：「阮老父有赫呢多倩工，𪜶攏有物通食，閣食到有賰，毋拘我佇遮啲欲餓死。我欲起來，轉去我的老父遐，給伊講：阿爸，我有得罪天，嘛有得罪你，已經無資格做你的子。請互我做你的倩工就好。」(17-19)這個細漢子提起勇氣往轉去的路，老父對他的態度是他想未到的。聖經描寫：「伊離𪜶兜猶真遠，老父就看著伊，心真毋甘，趕緊走倚去給伊攬啲，直直給伊唚。」(20)咱兼可以想像，一個年老的老父，逐日看著遠遠的所在，佇等候那個互他心碎的子兒轉來的心情。當他終於看見那個熟悉的身影，就無顧一切跑過去，給伊攬啲，直直給伊唚。

    老父聽見他悔改的心聲後，並無責備他的所作，也無將他趕出去，反轉是給僕人講：『趕緊挔(hiahⁿ)上好的外袍來給伊穿，給伊掛手指，閣給伊穿鞋，續牽彼隻肥的牛仔子來刣，來慶祝。因為我此個子是死去有閣活，失落有閣得著。』𪜶就開始慶祝。(22-24)這及浪子所想像的結果完全不同，呣若無被趕出去，反轉重新被接納。這位老父的身影，互咱看見什麼是真正的疼，他的疼攏呣是用講的，是用實際的行動來行出來。

    老父是常常互人忽略的角色，老父的身影可能無親像老母那麼溫柔，但是他卻親像一座穩固的山，是家庭重要的倚靠，他兼採未講疼的言語，但是他的疼攏佇家庭中踮踮付出。細漢的時對佇老父的身影只有驚惶，後來年紀漸漸多，結婚了後才開始理解，老父的威嚴呣是冷淡，是責任是重擔，他無用嘴講疼，是用他的行動行出疼，老父的疼常常是無聲的，但是是最堅定的。

    地上的老父無一定攏總完全，猶是有的老父無去盡著他們的責任放某放子，有的老父也及咱今仔日所看的這位老父無同款，但是感謝上帝，地上的老父兼採無完全，但是咱有一位永遠無變天頂的老父，天頂的老父呣是高高在上的審判者，是一位願意將咱攬條條，一直佇等候咱轉來的老父。

    今仔日這段記事呣只是一段故事，是上帝對咱每一個人的邀請。兼採咱曾離開這位天父，或是咱現在就是佇尋找這位天父，請咱要會記得，咱的天父就佇無遠的所在佇等候咱，咱只需要越身踏出咱的腳步，祂的雙手攏欲打開來接納咱。佇這個特別的日子，請咱閣一擺來想「老父的身影」，呣若想咱地上的老父，也要想咱天頂的老父，也期待自己成作互子兒思念的老父，願上帝的福氣賜互在座的每一位老父。